Принципиал тарзда Украина учун ўйнашни истамаган теннисчи Белозерцев қандай қилиб ўзбекка айланди? У "Ролан Гаррос"да ўйнайди

Аслида, Белозерцевнинг фуқароликни ўзгартириши ҳақида хабарлар ўтган йилнинг ёзидаёқ тарқалган эди. Аммо ўшанда Никита учун энг эҳтимолий вариант Болгария паспортини олиш бўлиб кўринаётганди. Чунки унинг мураббийи Стефан Пантов бир вақтнинг ўзида Болгария теннис федерациясининг Қора денгиз минтақаси бўйича координатори, федерация мураббийлар кенгаши аъзоси ва Болгария теннис федерациясининг техник директори сифатида ҳам фаолият юритарди.

Маълум бўлишича, бу жараёнга Болгария томонидан аниқ молиявий таклиф бўлмагани тўсқинлик қилган. Яъни Болгария теннис федерацияси истиқболли ўсмир теннисчига Болгария паспортини олишда ёрдам беришга тайёр бўлган, аммо Белозерцев томони маълум молиявий талабларни ҳам илгари сурган ва болгарлар буни қондириш имкониятига (ёки истагига) эга бўлмаган.

"Белозерцев жамоаси билан бутун теннис оламини айланиб, ўзларини таклиф қилиб юришди, — дейди теннисчига яқин бир манба. — Улар принципиал равишда Украина учун ўйнашни истамаган. Биламанки, улар Қозоғистон билан ҳам музокаралар олиб боришган.

Аммо Қозоғистонда теннисда мамлакат байроғи остида иштирок этиш учун бериладиган бошланғич молиявий бонуслар амалиёти вақтинча тўхтатилган ва эҳтимол, айнан шу омил томонларни келишувга келишига тўсқинлик қилган".

Натижада энди Белозерцев Ўзбекистон шарафини ҳимоя қиляпти. 

Манбамизнинг айтишича, ушбу ўтишлар Россия маблағлари ҳисобига амалга оширилган.

"Ўзбекистон одатда теннисда катта молиявий бонуслар таклиф қилмасди, — дейди бу мавзуда фақат аноним тарзда гапиришга рози бўлган халқаро эксперт. — Мендаги маълумотларга кўра, бу ўтишларнинг барчаси Россия маблағлари орқали амалга оширилган. Белозерцев тарихи ҳам бу рўйхатдан мустасно эмас".

Ҳозирда Белозерцев жаҳон рейтингида 787-ўринни эгаллаб турибди. У Ўзбекистоннинг иккинчи ракеткаси ҳисобланади. Олдинда уни ўсмирлар ўртасидаги "Ролан Гаррос" кутяпти.