Профессионал боксчимиз Жаҳонгир Расулов навбатдаги жангини Австралияда ўтказади

Яримўрта вазн тоифасида ўзбекистонлик профессионал бокс устаси, 26 ёшли Жаҳонгир Расулов фаолиятидаги олтинчи жангини ўтказиш арафасида.

У 22 апрель куни Австралиянинг Мельбурн шаҳрида жойлашган Kilda Town Hall аренасида ташкиллаштирилаётган бокс оқшомининг марказий жангида рингга кўтарилади. Ҳамюртимизга филиппинлик Жан Рик Карседо рақиблиқ қилади. Мазкур жанг 8 раунд этиб белгиланган.

Жаҳонгир Расулов профессионал боксда бешта жанг ўтказиб, уларнинг барчасида муддатидан аввал ғалаба қозонганини таъкидлаш лозим. У ўзининг сўнгги жангини март ойида Тошкентда ўтказган эди. Малавилик Ханнок Пиридан устун келган Расулов ўшанда WBC минтақавий камарига эга чиққан эди.

Жан Рик Карседо учун эса бу проф-боксдаги 11-жанг ҳисобланади. У жангларининг тўққизтасида ғалаба қозонган (9 KO), битта жангда мағлубият аламини тотиб кўрган.