Қаршида “Бош вазир кубоги ” мусобақалари ўтказилди

Қарши шаҳридаги “Насаф” футбол академияси стадионида ҳамда Қарши ихтисослаштирилган олимпия захиралари мактаб-интернатида Қашқадарё вилоят жисмоний тарбия ва спорт бошқармаси ташаббуси билан  вилоятдаги  бошқарама ва идораларнинг аппарат ходимлари ўртасида футбол ва волейбол спорт турлари бўйича  “Бош Вазир Кубоги” мусобақаси бўлиб ўтди.

Мазкур Кубок беллашувларида йигирма бешга яқин бошқармалардан 300 нафарга яқин масъул ходимлар иштирок этишди. 

Муросасиз ва қизғин баҳсларга бой тарзда ўтган беллашувларнинг эркаклар ўртасидаги футбол мусобақасида биринчи ўринни вилоят Касаба уюшмалари ташкилотлари бирлашмаси кенгаши жамоаси қўлга киритди. Иккинчи ўринни Ахборот ва оммавий коммуникациялар агентлиги вилоят ҳудудий бошқармаси жамоаси эгаллашган бўлишса, учинчи ўрин вилоят Касбий таълимни ривожлантириш ва мувофиқлаштириш бошқармасига насиб этди.

Аёллар ўртасидаги волейбол беллашувларида Қарши давлат университети жамоасига тенг келадигани топилмади. Улар барча рақибларини йирик натижалар ҳисобига мағлуб этиб, чемпионликни тантана қилишди. Иккинчи ўринни вилоят Мактабгача таълим бошқармаси жамоаси банд этган бўлса, учинчи ўринга Қарши муҳандислик – иқтисодиёт институти жамоси эришди.

Мусобақалар якунига етгач кучли учликдан жой олган жамоалар Қашқадарё вилоят жисмоний тарбия ва спорт бошқармаси томонидан  диплом, медаль ва ва эсдалик совғалари билан тақдирланишди.

Илҳом РАҲМОНОВ, ўз мухбиримиз