Қашқадарёда Иккинчи жаҳон уруши қатнашчилари ҳолидан хабар олинди

Эл-юртининг тинчлиги, осойишталиги, эрки ва озодлиги учун курашган инсонлар ҳамиша халқимиз ардоғидадир. Ана шундай мардлик ва жасорат намунасини кўрсатганларга, жанг майдонларида жонини фидо қилган боболаримиз, сабр-бардош билан катта қийинчиликларни енгиб ўтган момоларимизни шарафлаш, хотирасини абадийлаштириш, уларга ғамхўрлик ва эътибор кўрсатиш мустақиллик йилларида янгича маъно-мазмун билан бойиди. 

Зотан, бугун Ўзбекистон инсон, унинг ҳаёти, эркинлиги, шаъни, қадр-қиммати улуғланадиган буюк мустақил давлатга айланди.

Бу жиҳатдан юртимизда кенг нишонланаётган Хотира ва қадрлаш кунига бағишланган тадбирларда, она диёримиз халқимизнинг озодлиги ва истиқлоли, эркин ва фаровон ҳаётини мардлик ва шижоат билан ҳимоя қилган фидойи юртдошларимизга кўрсатаётган ғамхўрлик, ҳурмат-эҳтиромда янада яққол намоён бўлмоқда.

Шу боисдан, 9 май – "Хотира ва қадрлаш куни" муносабати билан, мазкур улуғ сана арафасида вилоят Жисмоний тарбия ва спорт бошқармаси ҳамда Касби туман ҳокимлиги ҳамкорлигида туманда истиқомат қилувчи Иккинчи жаҳон уруши қатнашчилари ҳолидан хабар олинди ва уларга турли ҳил озиқ-овқат маҳсулотлари улашилди.

Жумладан, "Майманоқ" МФЙ да яшовчи урушнинг қийин кунларини бошидан ўтказган 98 ёшли Жўраев Мирзо бобонинг, шунингдек, Муғлон қишлоғида яшовчи, урушда ўзининг матонати ва жасорати билан муносиб қатнашиб, ҳозирги кунда 96 ёшни қоралаган Шерматов Хайрулло боболарнинг ҳолларидан хабар олиниб, уларга ҳурмат-эҳтиром кўрсатилди.

Шу билан бирга, тумандаги Денов қишлоғининг энг ёши улуғ инсонларидан бири бўлган, Иккинчи жаҳон уруши қатнашчилари Назаров Эрка бобо ва Хўжакасби қишлоғининг мардлик ва жасорат намунаси тимсоли бўлган Азизов Исо боболарнинг ҳам ҳолларидан хабар олинди.