Қирғиз Республикаси билан ҳамкорликда ташкил этиладиган хоккей чемпионати бўйича янги маълумотлар берилди

Бироқ, кутилмаганда Қирғиз томони бу маълумотларни ижтимоий тармоқлардан ўчириб ташлади. Вазиятдан хабардор манба бўлмиш "Азия Спорт" нашри бунга қуйидагича муносабат билдирди: 

"Турнир барибир бўлиб ўтадиганга ўхшайди. Қирғизистонлик ҳамкасбларимиз Федерация вице-президенти Элзар Болотбеков билан боғланишди. Унинг айтишича, турнир бўлади. Мусобақа Ўзбекистон Очиқ чемпионати деб номланади. Ўзбеклар қозоқлар қилиши керак бўлган ишни қилишмоқда — Марказий Осиё мамлакатлари Лигаларини бирлаштиришмоқда. Кейинги йили турнир номи ўзгартирилиши режалаштирилган. У "Чегаралараро чемпионат" деб номланади. Халқаро хоккей федерацияси буни аллақачон тасдиқлаган. 2025 йил ноябрь ва декабрь ойларида ҳамда 2026 йил январь ва февраль ойларида бўлиб ўтадиган турнирнинг дастлабки босқичида бешта жамоанинг ҳар бири 14 та уй ва сафар ўйинларини ўтказади. Шундан сўнг, энг яхши тўртта жамоа ярим финалга йўл олади", дейилади хабарда. 

Маълум бўлишича, Ўзбекистон очиқ чемпионатида мамлакатимиздан "Ҳумо" (Тошкент), "Бинокор" (Тошкент) ва "Шердор" (Самарқанд) иштирок этади. Қирғиз Республикасининг "СДЮШОРСИ Алга" ва "Учур" клублари ушбу очиқ чемпионатда меҳмон жамоалар сифатида қатнашади.