Қитъа чемпионати старти олдидан Осиё дзюдо иттифоқи Конгресси ўтказилди

Унда Осиё дзюдо иттифоқи президенти Обайд Ал Анзи, федерация ва конфедерациялар раҳбарлари, делегатлар иштирок этди. Дастлаб, Осиё дзюдо иттифоқи президенти, Бош котиби, Бош ҳисобчиси ҳамда Ижроқўм аъзоларининг 2024 йил якунлари бўйича ҳисоботлари тингланди. 

Шундан сўнг Осиё дзюдо иттифоқининг Жанубий, Шарқий ва Марказий минтақалари бўйича вице-президентлари йил давомида амалга оширилган ишлар, ўтказилган мусобақалар бўйича ўз ҳисоботларини тақдим этишди. 

Шунингдек, Бангкок шаҳри мезбонлигида ўтадиган катталар ўртасидаги Осиё чемпионати ҳамда келаси йил Японияда ўтажак Осиё ўйинларига олиб борилаётган тайёргарликлар юзасидан ҳам ахборот берилди. 

Бундан ташқари, Осиё дзюдо иттифоқининг 2025 йилги тақвимидан ўрин олган кадетлар ва ёшлар ўртасидаги қитъа биринчиликлари ҳамда уларнинг манзилларига ойдинлик киритилди. 

Осиё дзюдо иттифоқи Конгрессида Ўзбекистон дзюдо федерацияси раиси Азизжон Камилов бошчилигидаги делегациямиз ҳам иштирок этди.