Қорақалпоғистонлик спортчи қизларга Президент совғалари топширилди

Президентимиз раҳнамолигида спорт, айниқса, болалар спортини ривожлантириш, иқтидорли ёшларни ҳар томонлама қўллаб-қувватлаш, уларнинг истеъдод ва салоҳиятини намоён этиши учун замонавий шароитлар яратишга алоҳида эътибор қаратилаётгани таъкидланди.

Биринчи Президентимиз Ислом Каримов ташаббуси билан ташкил этилган Ўзбекистон Болалар спортини ривожлантириш жамғармаси маблағлари ҳисобидан барпо этилиб, замонавий жиҳозлар билан таъминланган муҳташам спорт иншоотлари умумтаълим ва ўрта махсус, касб-ҳунар таълими муассасалари ўқувчиларининг спорт билан мунтазам шуғулланиши, энг муҳими, ҳар томонлама соғлом улғайшига хизмат қилмоқда.

Бу борадаги ишлар кўламини янада кенгайтиришда давлатимиз раҳбари Шавкат Мирзиёевнинг жорий йил 15 февралдаги “Маданият ва спорт соҳасида бошқарув тизимини янада такомиллаштириш чора-тадбирлари тўғрисида”ги фармони муҳим аҳамият касб этмоқда.

Президентимиз совғасини олган қизлар сафида Нукус шаҳридаги 9-умумтаълим мактабининг 9-синф ўқувчиси Ойгул Бердақова ҳам бор. У тўрт йилдан буён спортнинг енгил атлетика тури билан мунтазам шуғулланиб келади. Бир неча бор Қорақалпоғистон чемпиони бўлган Ойгул 2016 йили Қарши шаҳрида ўтказилган Ўзбекистон чемпионатида 800 метрга югуриш бўйича биринчи ўринни эгаллаб, олтин медални қўлга киритди.

– Президентимиз совғаси бизни янги марралар сари руҳлантиради, – дейди у. – Бизга кўрсатилаётган бундай юксак эътибор ва ишончни оқлаб, келгусида Ўзбекистонимиз шарафини халқаро миқёсда янада улуғлашга ҳисса қўшиш асосий мақсадимиздир.

Қорақалпоғистонлик 8 минг 330 га яқин спортчи қизга Президент совғалари топширилди.