Қойил, ҳар икки гроссмейстеримиз ҳам Жаҳон кубоги 1/4 финалига чиқди!

Дунёнинг 206 нафар шахматчиси иштирокида бошланган нуфузли мусобақанинг 1/8 финал иккинчи учрашувлари ўтказилмоқда. 19 ёшли Жавоҳир Синдаров кеча драматик кечган баҳсда германиялик гроссмейстер Фредерик Свенни мағлубиятга учратганди. Бугун жавоб партиясида Жавоҳир қора доналарда ўйнаганига қарамай, ўзи учун керакли дуранг натижасини қайд эта олди. Свен учинчи босқичда амалдаги жаҳон чемпиони ҳиндистонлик Гукеш Доммараджуни мусобақадан чиқариб юборганди. 

Бешинчи даврага етиб келган иккинчи гроссмейстеримиз Нодирбек Якуббоев ҳам бугуннинг ўзида чорак финал масаласини ижобий ҳал қилди. Кеча арманистонлик Габриэль Саргиссянга қарши кечган илк партия дуранг натижа билан тугаганди. Бугун оқ доналарда ўйнаган Якуббоев рақибини таслим этиб, Синдаров сингари плей-оффга ҳожат қолдирмади. 

Жавоҳир Синдаров — Фредерик Свен (Германия) - 1,5:0,5

Нодирбек Якуббоев — Габриэл Саргиссян (Арманистон) - 1,5:0,5

Эслатиб ўтамиз, Шамсиддин Вохидов ва Нодирбек Абдусатторов учинчи босқичда рақибларига имкониятни бой бериб, жаҳон Кубогидаги иштирокларини якунлаган эди. Улар 11 000 АҚШ доллари миқдоридаги пул мукофотини қўлга киритишди. Синдаров ва Якуббоевнинг 1/4 финалдаги рақиблари эртага ўтказиладиган плей-офф ўйинларидан сўнг маълум бўлади.