Қозоғистон бокс терма жамоаси мураббийи истеъфога чиқадими? Галим Кенжeбаев шогирдларининг муваффақиятсиз иштироки ҳақидаги саволларга жавоб берди

Биз интервьюни ўзбек тилига таржима қилган ҳолда эътиборингизга ҳавола қиламиз.

- Ярим финалда Сакен Бибосиновга умид боғлаган эдик. Албатта, унинг рақиби Сакенга яхшигина қаршилик кўрсата оларди. Биринчи раундда нокдаун бўлди ва бу раунд бутун жанг натижасини олдиндан белгилаб қўйди. Иккинчи ва учинчи раундларда Бибосинов ғалабага лойиқ эди, лекин биринчи раундда ўтказиб юборилган очколар таъсир кўрсатди. Биз барча боксчиларимиздан ғалаба кутгандик, лекин қаердадир омадимиз келмади, улар жангларида мағлуб бўлишди. Шуни таъкидлашни истардимки, Сакен турнирни муаммосиз ўтказди ва яхши бокс кўрсатди.

Боксчиларнинг жисмоний тайёргарлигига келсак, ҳаммаси яхши эди. Улар махсус ўқув -машғулот йиғинлари, умумий жисмоний тайёргарлик, спарринг баҳслардан ўтдилар. Тан оламан, гарчи йигитлар тажрибали бўлишсада, Олимпиадада спортчиларга босим таъсир кўрсатди.

- Лицензион турнирда иштирок этиш учун боксчиларни қандай тартибда танладингиз? Серик Темиржанов турнирга борди,у мамлакат чемпиони эмас. Серик Олимпиадада ютқазган америкалик Дюк Раган аввалроқ 2017 йилги жаҳон чемпионатида бизнинг Кайрат Ералиевга мағлуб бўлганди. Шунга қарамай, танлов Ералиев фойдасига ҳал бўлмади. -81 кг вазн тоифасида Бек Нурмаганбет Осиё чемпионлигини қўлга киритди, лекин сиз Бекзад Нурдаулетовни танладингиз.

- 2019 йилда Қозоғистон чемпионати бўлмади. Мен айнан 2019 йилдан ишлай бошладим, бир неча ойдан кейин ички чемпионат ғолиблари борган Осиё чемпионати бўлиб ўтди. 2019 йил сентябрь ойида жаҳон чемпионати бўлди ва ундан аввал Президент Кубоги бўлиб ўтди, у ерда Бек Нурмаганбет жароҳати туфайли қатнашмади. Кайрат Ералиев ўша турнирда иштирок этди: Ералиев на Осиё чемпионатида, на Президент кубогида юқори натижаларни кўрсата олмади. Шунга қарамай, Ералиев жаҳон чемпионатига йўл олди, ерда ҳам мағлуб бўлди. Шу билан бирга Бекзод Нурдаулетов жаҳон чемпиони бўлишга муваффақ бўлди. Барчангиз буни кўрдингиз.

Кейин Актау шаҳрида турнир ташкил қилинди, унда -57 кг ва -75 кг гача вазн тоифасида ҳал қилувчи спарринглар бўлиб ўтди. Турсинбай Кулахмет ва Абилхан Аманкул ўзаро жанг қилишди. -69 кг вазн тоифасида бизда жаҳон чемпионати совриндори Абилайхан Жусупов бор эди. Агар унинг рақиби Шимбергенов ҳақида гапирадиган бўлсак, у Осиё чемпионатига борди, ўзбекистонлик боксчи Бобо-Усмон Батуровга имкониятни бой берди. Шунинг учун у Президент кубогида қатнашмади, шу жумладан унинг жароҳати ҳам бор эди. Ўзаро учрашувда Кайрат Ералиев Толтаевга ютқазди ва Серик Темиржанов турнир чемпионига айланди. Турсинбай Кулахмет Абилхан Аманкулга мағлуб бўлди. Лицензион турнир олдидан Закир Сафиуллин Қозоғистондаги асосий рақибларини енгди, шунинг учун у Иорданияга борди. Лицензион турнир Хитойда ўтказилиши режалаштирилган эди, аммо пандемия туфайли мусобақа бекор қилинди. Қисқаси, барча боксчилар жиддий танловдан ўтди.

- Бокс бўйича Қозоғистон терма жамоасининг сўнгги натижалари билан боғлиқ ҳолда, ўз хоҳишингиз билан терма жамоа бош мураббийи лавозимини тарк этиш ҳақида ўйлаяпсизми?

- Албатта, бундай фикрлар бўлиши мумкин. Ҳамма нарсани раҳбарлар муҳокама қилади ва қарор қабул қилади.

- Яъни, агар раҳбарият сизни лавозимда қолдирса, терма жамоада бош мураббий сифатида ишлашда давом этасизми?

- Буни раҳбарият ҳал қилади, мен ҳозир сизнинг саволингизга жавоб бера олмайман.

- Абилхан Аманкулнинг жароҳати ҳақида маълумот бера оласизми?

- Аманкул аввал «Астана Арланс»да жанг қилиб қўлини синдирганди. Олимпиадада ўзбек боксчиси билан жанг пайтида у яна қўлидан жароҳат олди. Албатта, биз уни қайта тиклашга ҳаракат қилдик, ҳатто оғриқ қолдирувчи укол ҳам қилдик. Чап қўли уни безовта қилди. Эски жароҳат ўзини эслатди.