Қозоғистон ўзбекистонлик ММА жангчисини халқаро қидирувга берди

Бу ҳақда Sports.kz Қозоғистон Республикаси Молиявий мониторинг агентлиги матбуот хизматига таяниб хабар бермоқда.

«Диққат, қидирув!

Молиявий мониторинг агентлиги томонидан халқаро қидирувга эълон қилинди: Ҳикматов Маҳмуд Умидович, 19.02.2000 йилда туғилган, Ўзбекистон Республикаси фуқароси, “Маха.dxb” тахаллуси билан танилган блогер.

Суд томонидан унга нисбатан қамоққа олиш эҳтиёт чораси қўлланилиши санкцияланган. У ноқонуний интернет-казинони тарғиб қилишда гумон қилинмоқда.

Қозоғистон Республикаси ҳудудида ноқонуний интернет-казино интерфейсини тақдим этиш, пул маблағларини қабул қилиш ва тўлаш (эквайринг, мобил тижорат, криптовалюта), шунингдек, мамлакат фуқаролари орасидан кўпроқ ўйинчиларни жалб қилиш мақсадида реклама тарқатиш бўйича барқарор схема фаолият юритган.

Интернет-казинони тарғиб қилиш мақсадида ташкилотчилар блогер Ҳикматов М. У.ни жалб қилган. Унга Қозоғистон ҳудудида фаолият юритувчи инфлюенсерларни реклама контентини жойлаштиришга жалб қилиш вазифаси юклатилган.

Ушбу фаолият доирасида Ҳикматов М. У. блогерлардан уларнинг ижтимоий тармоқларидаги статистик маълумотларни, жумладан, обуначиларнинг демографик ва географик кўрсаткичлари, шунингдек, аудитория қамрови ҳақидаги маълумотларни сўраган. Шу маълумотлар асосида реклама хизматларининг қиймати белгиланган.

Агар қидирувдаги шахснинг қаердалиги ҳақида бирор маълумотга эга бўлсангиз, Молиявий мониторинг агентлигига хабар беришингизни сўраймиз», — дейилади Egov сайтидаги хабарда.

Ҳикматов Қозоғистоннинг Олмаота шаҳридаги RUH Fighting Championship (RFC) медиалигасида жанг қилган.