Қозоғистонда легионерларни давлат бюджетидан молиялаштириш тақиқланади

Қозоғистон Республикаси Президенти ҳузуридаги Марказий алоқалар хизмати эфирида вице-вазир Серик Жарасбаевнинг маълум қилишича, энди Қозоғистонда футбол, хоккей ва бошқа спорт клубларида ўйнайдиган чет эллик ўйинчилар давлат бюджети ҳисобидан маош олмайди. Бу норма Туризм вазирлигининг янги қонун лойиҳасида белгилаб қўйилади.

Шунингдек, унда асоссиз юқори тўловларнинг олдини олиш мақсадида спортчилар маошларига чеклов ўрнатиш ҳамда футбол ва бошқа спорт клубларини молиялаштириш учун чегаралар белгилаш кўзда тутилган.

Бундай норма 2020 йилдан бери амалда бўлса-да, фақат ҳукумат баённомаси даражасида тасдиқланганди. Шу сабабли у минтақаларда ҳар доим ҳам тўлиқ бажарилмаган.

Жисмоний тарбия ва спорт масалалари ҳамда ортиқча тартибга солишни бекор қилиш бўйича вазирликнинг қонун лойиҳаси Мажлис томонидан аллақачон маъқулланди. Бу воқеа 2025 йил 29 январда юз берди ва шундан сўнг лойиҳа Сенатга юборилди.