Қозоғистонлик эркин курашчилар икки вазнда йўлланмалар учун гиламга чиқишади

Эркин кураш бўйича Қозоғистон терма жамоаси бош мураббийи Асет Серикбаев лицензион турнирда иштирок этувчи икки курашчи номини эълон қилди. Мезбонлар 86 ва 125 кг вазн тоифаларида ҳали Олимпиада йўлланмасини қўлга киритишмаган.  

"Бизга Токиога тўлиқ таркибда боришимиз учун иккита лицензия етмаяпти. Курашчиларимиз 86 ва 125 кг вазнда йўлланмаларни қўлга киритиш учун бор имкониятларини ишга солишади. Биз 86 кг вазнда Қозоғистон чемпиони, Осиё чемпионатининг икки карра совриндори Азамат Даулетбеков ҳамда 125 килограммда амалдаги Осиё чемпиони Юсуп Батирмурзаевга ишонч билдирдик. Осиё чемпионатини қатнашадиган таркибни эса кейинроқ эълон қиламиз", - деди Асет Серикбаев. 

Эслатиб ўтамиз, Қозоғистон эркин кураш терма жамоаси 2019 йил Нур-Султан шаҳрида ўтган жаҳон чемпионатида 57, 65, 74 ва 97 кг вазн тоифаларида Токио Олимпиадаси йўлланмасини қўлга киритган эди.