Қудратилло Абдуқаҳҳоров 14 декабрь куни Мексикада жанг қилиши ҳақида хабарлар тарқалмоқда

31 ёшли чарм-қўлқоп устаси шу кунларда Америка Қўшма Штатларининг Лос-Анжелес шаҳрида машғулотларни олиб бормоқда.

Унинг мураббийи Эдди Де Ла Хуэртанинг хабар қилишича, боксчимиз 14 декабрь (Тошкент вақти билан 15 декабрь тонгида) Мексиканинг Тихуана шаҳрида ўтказиладиган профессионал бокс оқшоми доирасида рингга кўтарилади.

Абдуқаҳҳоровнинг жанги оқшомнинг co main event, яъни иккинчи асосий жанг доирасида бўлиб ўтади. Бироқ ҳозирча ҳамюртимизга ким рақиблик қилиши номаълум.

Тихуанадаги бокс оқшомининг марказий жанги мексикалик Хайме Мунгия ва Франция вакили Бруно Сюрейс ўртасида кечади.

Маълумот ўрнида, Қудратилло Абдуқаҳҳоров (20-3-0) сўнгги жангини май ойида грециялик Андреас Катзуракисга қарши ўтказиб, очколар ҳисобига кўра мағлуб бўлганди.