Rafa Nadal Open. Cултоновда учинчи ғалаба, у 1/8 финалда!

Мукофот жамғармаси 74,825 еврони ташкил этувчи ушбу турнирда ҳамюртимиз Ҳумоюн Султонов ҳам муваффақиятли одимлаяпти. Rafa Nadal Open by Movistar турнири теннис афсонаси Рафаэль Надаль томонидан ташкил этилаётгани билан ҳам аҳамиятли ҳисобланади. 

Саралаш баҳсларида биринчи рақам остида таснифланган Султонов 1/2 финалда италиялик Фабрицио Андалорони 6/3, 6/1, финал учрашувида эса рейтингнинг 493-поғонасида бораётган франциялик Саша Геймар Вайенбургни 6/4, 6/4 ҳисобида таслим этганди. 

Мамлакатимизнинг биринчи ракеткаси асосий тўрнинг 1/16 финал босқичида франциялик 21 ёшли Робин Бертранга қарши кортга чиқди. Икки соату 26 дақиқа давом этган баҳсда Ҳумоюн рақибини 6/2, 6/7(4), 6/4 ҳисобларида мағлубиятга учратди. Султонов 9, Бертран 6 та эйс зарбасини амалга оширган. Қўшхатолар Робинда кўпроқ бўлди - 4 га 2!  

Бу теннисчиларнинг ўзаро иккинчи учрашуви бўлди. Шу йилнинг 24 апрель куни Шарм Эл-Шейх М25 турнирида Робин 1/6, 6/1, 6/4 ҳисобида ғалаба қозонган эди. Демак, ҳамюртимиз ўша мағлубият учун муносиб реванш ола билди.    

Таққослаш учун, Ҳумоюн Султонов ATP рейтингида 264-ўринни эгаллаб турибди. Робин Бертран эса 274-поғонадан жой олган. Бугун теннисчимиз 1/8 финалда Рафаэль Коллиньонга қарши кортга чиқади. Бельгиялик 22 ёшли иқтидор эгаси айни пайтда дунёнинг 199-ракеткаси бўлиб турибди. Ушбу учрашув бизнинг вақт билан соат 18:00да бошланади.