Рафаэль Надаль: "Алькаразнинг Мадриддаги ғалабаси мен учун сюрприз бўлмади"

"У аллақачон Майами ва Барселонадаги турнирда ғалаба қозонган. Тўғрисини айтсам, Мадриддаги ғалаба мен учун катта сюрприз бўлмади. У учун хурсандман. Унинг айни дамда ўзига қанчалик ишониши ва қай даражага чиқа олиши ҳаммага тушунарли. 

Юртимизда узоқ вақт ўйнай оладиган ажойиб теннисчи пайдо бўлганидан хурсандман. Айниқса, уйда ғалаба қозониш ҳар доим ёқимли. Бу унинг учун Мадриддаги ўзгача ҳафта бўлса керак", - деди Надаль.

Надаль, шунингдек, "Ролан Гаррос"-2022'да бу йил биринчи марта Новак Жокович билан битта “Катта Дубулға” турнирида иштирок этишини изоҳлади.

"Менимча, бу унчалик катта аҳамиятга эга эмас. Теннис Новак ва мендан кўра муҳимроқ. Чемпионлик учун кураша оладиган теннисчилар кўп. Бундан 5-10 йил олдингидек, уч-тўрт нафар теннисчи чемпионлик учун курашадигандек туюлаётгандир, аммо ҳаммада имконият бор. Менимча, бугунги кунда вазият бошқача.

Мухлислар мени, Рожер ва Новакни кортда кўришни афзал билишади. Турнирда энг кучлилар иштирок этса, ҳар доим яхши. Аммо, вазият ўзгармоқда, биз ҳам қарияпмиз. Янги авлод кучайиб бормоқда. "Ролан Гаррос" муҳим турнир. Ўйлашимча, чемпионликни қўлга киритиш учун кўпчиликда имконият бор".