Рафаэль Надални Рим "Мастерс"да "сочиб" ташлашди

Грунт қироли Рафаэль Надаль турнирнинг иккинчи даврасида дунёнинг тўққизинчи ракеткаси бўлиб турган польшалик Хуберт Гуркачга қарши кортга чиқди. Испаниялик теннис афсонаси айни пайтда ATP рейтингида 305-поғонадан жой олган. Тўқсон икки дақиқа давом этган баҳсда Гуркач афсонага имконият қолдирмади - 6/1, 6/3.

Бу теннисчиларнинг ўзаро ўтказган илк учрашуви сифатида тарихга кирди. Надаль 1, Гуркач 9 та эйс зарбани амалга оширган. Иккала теннисчи ҳам 1 тадан қўшхатога йўл қўйган. Брейклар 4 га 0 кўринишида ғолиб теннисчи фойдасига ҳал бўлди. Надаль Рим "Мастерс" турнирининг ягона 10 карра чемпиони ҳисобланади. 

Энди Хуберт Гуркач учинчи босқичда Томас Мартин Этчеверрига қарши кортга чиқади. Аргентиналик ракеткаси устаси иккинчи даврада бразилиялик Тьяго Зайбот Вилдадан 6/3, 7/5 ҳисобида устун келди.