Рамазон Темиров иштирок этадиган UFC Абу-Даби турнирининг марказий жанги эълон қилинди

Ташкилот матбуот хизмати ушбу турнирнинг асосий қарама-қаршилигини эълон қилди.

Унга кўра, ўрта вазн тоифасидаги рейтингда бешинчи ўринни эгаллаб турган австралиялик спортчи Роберт Уиттакер мазкур мусобақада 13-поғонадаги Нидерландия вакили Ренье де Риддер билан тўқнаш келади.

34 яшар Уиттакер сўнгги жангини ўтган йилнинг октябрь ойида айнан Абу-Дабида ўтказган ва Хамзат Чимаевга мағлуб бўлганди. Унинг ҳисобида жами 26 та ғалаба ва 8 та мағлубият бор. Фаолияти давомида 22 та жанг ўтказиб, 20 та ғалаба ва 2 та мағлубият қайд этган ONE FC собиқ чемпиони Ренье де Риддер эса 4 май тонгида Бо Никални муддатидан олдин енгганди.

Маълумот учун, UFC Абу-Даби турнирида ҳамюртимиз Рамазон Темиров қозоғистонлик Асу Алмабаевга қарши жанг қилади.