Расман! Баҳодир Жалоловнинг Англиядаги жанги тасдиқланди (Постер+Кард)

Ҳаваскор боксда икки карра Олимпиада чемпиони 9 май куни Queensberry промоутерлик компанияси томонидан ташкил этиладиган проф бокс оқшомида ўзининг 18-жангини ўтказади. Сурхондарёлик боксчимиз шу куни хорватиялик Агрон Смакичига қарши рингга кўтарилади. Ушбу жанг ташкилотчилар томонидан расман тасдиқланди. 

Аслида, Баҳодир Жалолов ва Агрон Смакичи ўртасидаги жанг 2024 йилда IBA.Pro турнири доирасида ўтказилиши керак эди. Аммо ўшанда Жалоловнинг ўрнини бошқа бир ҳамюртимиз — Жаҳонгир Зокиров эгаллаган ва хорватиялик тажрибали рақибини очколар ҳисобига кўра мағлуб этган эди.

Маълумот учун, Баҳодир Жалолов 17 та (15 таси нокаут билан) жангининг барчасида зафар қучган. Сўнгги жангини 2025 йилнинг ноябрь ойида Соломон Адебайога қарши ўтказиб, рақибини тўртинчи раундда нокаутга учратганди. Смакичи эса 2025 йилнинг октябрида россиялик Артем Сусленковга бешинчи раундда техник нокаут билан ютқазиб қўйган эди. Унинг ҳисобида 21 ғалаба (19 нокаут) ва 3 мағлубият бор. 

Манчестердаги профессионал бокс оқшомининг асосий жанги ҳам супероғир вазн тоифасида ўтказилади. Унда Даниэль Дюбуа Фабио Уордлига қарши рингга чиқади.