Расман: Богдан Гусковнинг собиқ чемпионга қарши жанги эълон қилинди (+Асосий кард)

9 май куни АҚШнинг Ньюарк шаҳрида ўтказиладиган ММА бўйича UFC 328 турнири учун навбатдаги жанглар тасдиқланди.

Аввал хабар берганимиздек, мазкур турнир доирасида ярим оғир вазн тоифасидаги аралаш яккакураш устамиз Богдан Гусков UFC собиқ чемпиони, полшалик Ян Блаховичга қарши октагонга чиқади.  

Уларнинг илк жанги ўтган йилнинг декабрь ойида UFC 323 турнирида ўтказилиб, дуранг натижа билан якунланган эди. Ўша жангдан Блахович умумий ҳисобда 321 минг, Богдан Гусков эса 53 минг АҚШ доллари ишлаб олганди. 

UFC 328 мусобақасининг марказий жанги БАА вакили, ўрта вазн чемпиони Хамзат Чимаев ҳамда америкалик собиқ чемпион Шон Стрикленд ўртасида кечади.

Маълумот учун, Ян Блахович ҳисобида 29 ғалаба, 11 мағлубият ва 2 дуранг бор. Ангренлик Гусковнинг ММАдаги рекорди 18 ғалаба, 3 мағлубият ва 1 дурангни ташкил қилмоқда. У UFC`да тўртта ғалабали сериядан кейин дуранг натижа қайд этган эди.