Расман: Катталар ўртасида кураш вазн тоифалари 16 тага етказилди!

Аввалроқ, эркаклар 7 та ва аёллар 8 та вазн тоифасида беллашган бўлса, энди эркаклар учун янги – 120 кг вазн тоифаси жорий этилди.

Бу ўзгариш халқаро нуфузли спорт мусобақаларида Курашнинг иштирокини мустаҳкамлаш мақсадида амалга оширилди. Хусусан, 2024 йил давомида AIMS (Alliance of Independent Recognized Members of Sport) ташкилотига аъзолик жараёнларида вазн тоифаларини мақбуллаштириш масаласи бир неча бор муҳокама қилинди. Таҳлиллар натижасида вазн тоифаларини тенглаштириш тавсия этилди.

2024 йил 13 апрель куни бўлиб ўтган IKA Бошқарув кенгаши йиғилишида бу масала атрофлича кўриб чиқилди ва эркаклар учун 120 кг вазн тоифасини қўшиш бўйича якуний қарор қабул қилинди.

— Биз 8 ой давомида барча техник ва тактик жиҳатларни чуқур ўргандик, — дейди IKA Бош котиби Муҳаммад Реза Нассирий. — Курашни халқаро стандартларга мослаштириш учун вазн тоифаларини қисқартириш эмас, балки янги вазн қўшиш энг тўғри қарор бўлди. Бу бошқа курашчилар учун ҳам янги имкониятлар яратади.

Катталар ўртасида Кураш вазн тоифалари қуйидагича белгиланди:

Эркаклар: -60 кг, -66 кг, -73 кг, -81 кг, -90 кг, -100 кг, -120 кг, +120 кг.

Аёллар: Олдинги тартиб сақлаб қолинди.

Янги вазн тоифаси 2025 йилда IKA томонидан ташкил этиладиган барча расмий мусобақаларда амалга жорий қилинади.