Расман. Кураш – Халқаро Ҳарбий Спорт Кенгаши (CISM)нинг расмий спорт тури сифатида эътироф этилди!

Биз учун аҳамиятлиси, Бош Ассамблея йиғилишида CISM миллий курашимизни расман ўз тақвимидан жой олган спорт тури сифатида эътироф этди. 1948 йилда ташкил этилган ва бош қароргоҳи Бельгияда жойлашган CISM – 140 та аъзо давлатни бирлаштирган, ҳарбийлар ўртасида спорт орқали тинчлик ва дўстликни тарғиб қилувчи нуфузли халқаро ташкилот ҳисобланади.

Мазкур ютуқ – Халқаро Кураш Ассоциацияси (IKA) ҳамда Ўзбекистон Қуролли Кучлари ва Ўзбекистон Кураш Федерациясининг изчил ҳаракатлари, музокаралари ва ҳамкорлиги самарасидир.

Бош Ассамблеяда IKA Техника директори жаноб Рави Капур томонидан тайёрланган Кураш тақдимоти CISM раҳбарияти томонидан катта қизиқиш билан қабул қилинди ва унинг натижасида Кураш CISM тақвимига киритилди.

CISM доирасидаги биринчи расмий Кураш мусобақаси — Kurash Challenge Cup — 2026 йил 5-6 сентябрь кунлари Ўзбекистонда ўтказилади. Аҳамиятлиси шундаки, мусобақанинг финал куни — 6 сентябрь — Жаҳон Кураш кунига тўғри келади.

Халқаро Кураш Ассоциацияси Президенти Ҳайдар Фармон мазкур муҳим жараёнда фаол иштирок этган ва ташаббусни илгари сурган IKA Бош котиби жаноб Реза Насирийга, CISM раҳбариятига, Ўзбекистон Республикаси Мудофаа вазирлиги, Спорт вазирлиги ҳамда Ўзбекистон Кураш Федерациясига ҳам ўз миннатдорлигини изҳор этди.

“Бу – бутун жаҳон Кураш оиласи учун фахрли ва қувончли кундир. Кураш фақат спорт эмас – у тинчлик ва шараф рамзи бўлган маънавий меросдир. Унинг CISM спорт дастурига киритилиши халқаро майдонда, айниқса, ҳарбий спортчилар орасида янги юксак босқични белгилаб беради”, — дейилади IKA Президенти мактубида.

Курашнинг CISM доирасига расман киритилиши – унинг халқаро ривожланишидаги янги босқични бошлаб берди. Бу нафақат спортчилар учун, балки миллий федерациялар ва миллионлаб мухлислар учун ҳам катта имкониятлар эшигини очади.

Энди Кураш нафақат спорт, балки турли халқлар, маданиятлар ва армиялар ўртасида дўстлик кўприги сифатида хизмат қилади. 2026 йилдаги расмий дебютни дунё қизиқиш билан кутмоқда – бу Курашнинг интизом, анъана ва глобал бирликка асосланган шонли тарихидаги янги саҳифа бўлади.