Расман! UFC 330 турнирининг асосий жангини ким суғурталаши маълум

Дивизион рейтингида учинчи ўринни эгаллаб турган Майкл Моралес 16 кундан сўнг Филадельфияда бўлиб ўтадиган UFC 330 турнирининг расмий вазн ўлчаш маросимида иштирок этади. У тадбирнинг асосий жангини суғурталовчи (захира) жангчи сифатида қатнашади. 

Бу ҳақда мағлубият нималигини билмай келаётган эквадорлик жангчининг ўзи ММА Junkie нашрига берган интервюсида маълум қилди.

"Менга Ислам ва Иэн ўртасидаги жангни кутишимни, шундан сўнг навбатдаги даъвогар бўлишимни айтишди. Ҳозир мени улардан бири вазн қила олмаса ёки жангда қатнаша олмаса, ўрнига чиқишим учун захира жангчиси этиб тайинлашди. Агар шундай бўлса, мен дарҳол ўринга чиқаман. Демак, ё ҳозир чемпионлик учун жанг қиламан ёки яна бир жангни кутиб, кейин чемпионлик камари учун курашаман. Бошқа вариант қолмади", – деди Моралес.

Ўтган ойда Майкл Моралес Карлос Легаспи билан суҳбатда ушбу рақамли турнир доирасида навбатдаги жангини ўтказишини айтган ва рақиби бразилиялик Карлос Пратес бўлиши мумкинлигини истисно этмаган эди. Бироқ, 16 август куни эквадорлик жангчи октагонга фақат асосий жанг учун ўринбосар керак бўлгандагина чиқади, унга тайинланган жанглар ҳақидаги барча хабарлар эса ҳақиқатга тўғри келмайди.

Айни дамда 27 ёшли жангчи UFC`да етти ғалабадан иборат серияни қайд этмоқда. У ўзининг сўнгги жангида америкалик Шон Брэдини биринчи раунддаёқ техник нокаут эвазига мағлуб этган эди.