Расман! Усман Нурмагомедов - Пол Хьюз реванш жанги эълон қилинди

Ушбу жанг 3 октябрь куни БААнинг Дубай шаҳрида бўлиб ўтади. Чемпионлик жанги марказий мақомда бўлади. Ғолиб енгил вазнда PFL чемпионлик камарини қўлга киритади. Бундан етти ой олдин ўтказилган жангда Нурмагомедов ҳакамларнинг кўпчилик овози билан Хьюзни мағлубиятга учратган эди. 

Шу йилнинг май ойида ирландиялик аралаш яккакураш устаси ғалаба билан қайта олди. У ўз ватани Белфастда ўтган турнирда бразилиялик Бруно Мирандани 42 сониядаёқ нокаутга учратди. Усман эса ўша илк жангдан бери ҳали октагонга қайтмади. 

3 октябрь кунги турнирнинг co-main event жанги ҳам чемпионлик мақомида бўлади. Яримоғир вазн тоифасида ташкил этиладиган тўқнашувда собиқ Bellator чемпиони Кори Андерсон PFL мавсумининг ўтган йилги ғолиби туркманистонлик Довлетжан Ягшимурадовга қарши октагонга чиқади. Бу жанг ҳам реванш мақомига эга бўлиб, 2021 йилнинг апрель ойида Bellator турнири доирасида ўтган баҳсда Андерсон учинчи раундда техник нокаут эвазига зафар қучганди. 

Бундан ташқари, Дубайдаги ушбу турнирнинг яна бир жанги ҳам расман тасдиғини топди. Собиқ UFC жангчилари россиялик Зубайра Тухугов ҳамда Ирландия шарафини ҳимоя қиладиган рус аралаш яккакураш устаси Артём Лобов ўзаро ҳисоб-китоб қилиб олишади.