Расман. WBA Наоя Иноуэ — Муроджон Аҳмадалиев жангига буйруқ берди!

Ташкилот томонларга расмий хат юбориб, ҳар икки жамоага жанг ҳақида хабар берди. Музокара учун 30 кун мухлат берилди, муддат 14 июль куни тугайди.

Регламентда айтилишича, чемпион камарни қўлга киритган кундан бошлаб тўққиз (9) ой ичида мавжуд бўлган энг яхши даъвогарга қарши унвонини ҳимоя қилиши керак.

Иноуэ 2023 йилнинг 26 декабрида чемпионликни қўлга киритган ва унинг навбатдаги мажбурий ҳимояси шу йилнинг 25 сентябридан кечиктирмай ўтказилиши керак. WBA йўналишидаги мажбурий даъвогар эса айнан ҳамюртимиз Муроджон Аҳмадалиев бўлиб турибди.

Агар белгиланган муддатда келишувга эришилмаса ёки томонлардан бири жангни имзолашдан бош тортса, қўмита ички қоидаларига мувофиқ промоутерлар ўртасида ким ошди савдоси ўтказади.

Маълумот учун, WBA ва IBF йўналишларида собиқ жаҳон чемпиони бўлган Муроджон Аҳмадалиев АҚШда машғулотларни давом эттирмоқда.