Равшан Рўзиқулов: "Асосий эътибор лицензион турнирга қаратилган"

Ушбу йиғин Навоийдаги Ўзбекистон чемпионати ҳамда декабрда Сербия мезбонлигида ўтадиган жаҳон чемпионатига тайёргарлик босқич вазифасини ўтаб бераяпти. 

"Ўқув-машғулот йиғинимиз режа асосида давом этмоқда. Истайсизми йўқ, узоқ давом этган карантин ўз таъсирини ўтказмай қолмади. Тан олиш керак, курашчиларимизнинг спорт формаси талаб даражасида эмасди. Ҳозирги ҳолатда ҳам идеал дея олмайман. Шу боисдан бу йиғинда асосий эътиборни терма жамоа аъзоларининг жисмоний ҳолати, спорт формасини яхшилашга қаратаяпмиз. Тўғри, бу иш осон бўлмайди. Бунинг учун вақт керак. Камида бир, кўпи билан икки ой шуғулланиш талаб этилади. 

Энг муҳими, спортчиларимизнинг кайфияти юқори даража, ишчанлик хусусияти, машғулотда қатнашиш учун иштиёқ бор. Бир сўз билан айтганда, курашчиларниг техник-тактик, функционал, жисмоний тайёргарлигини кўтариш учунмаксимал даражада ҳаракат қилаяпмиз. Бир ярим ойдан сўнг жаҳон чемпионати бўлса-да, асосий эътиборимиз келгуси йилнинг март ойида ўтказиладиган Олимпиаданинг лицензион турнирига қаратилган. Жаҳон чемпионатида қатнашсак ҳам ёмон бўлмасди. Чунки, йигитлар деярли бир йилдан бери мусобақа кўришмади", - деди биз суҳбатда терма жамоа бош мураббийи Равшан Рўзиқулов.