Равшан Ходжаев: "Одилжон Аслонов жангга тайёр!"

Шу муносабат билан спортчимизнинг устозларидан бири Равшан Ходжаевдан бўлажак рақиб ва тайёргарлик жараёнлари хусусида сўрадик.

"Одилжоннинг проф боксдаги рақиби ҳақида гапирсам, Никита Зон россиялик боксчи, ҳали проф боксда мағлубиятга учрамаган, 4 та жангда 4 та ғалаба, шундан 3 тасида нокаут орқали зафар қучган. Ишонаманки, шогирдимиз бу боксчини мағлуб эта олади. Яна бир маълумот, агарда Одилжон Аслонов рақибини енгга олса, рейтингда 150 нафар боксчилар орасига кириб олади.

Биз россиялик боксчининг жангларини кузатдик, асосан зарбаларини чап қўлда йўллар экан. Бу каби чапақай спортчилар доим ноқулайлик туғдиради. Аммо, биз барчасига тайёрмиз ва рақибга қараб тактика қўямиз.

Яқиндагина Россияда бўлиб ўтган профессионал боксчилар ўртасидаги "Қитъалар кубоги" турнирида Одилжон Аслонов ҳам иштирок этди. Бу мусобақа биз учун бўлажак жанг олдидан тайёргарлик жараёнини ўтаб берди. 

Москвадан қайтганимиздан сўнг бир оз ҳордиқ чиқардик, сўнгра Одилжон Тошкент вилояти тоғ ён бағрларида жойлашган "Янгиобод" ўқув-машғулот базасида ҳамкасбим, кўплаб чемпион боксчилар устози, қолаверса, Аслоновнинг ҳам мураббийи Ҳамза Авезов қўл остида шуғулланди ва жисмоний ҳолатни тикловчи машқларга эътибор қаратишди.

Ҳозирда жанг олди тайёргарликнинг сўнгги босқичини шаҳримиздаги Олимпия ва Паралимпия захиралари коллежи бокс залида олиб боряпмиз. Аниқ айта оламанки, Одилжон 100 % жангга тайёр".

Мақсуд Комилов ёзиб олди, Ўзбекистон бокс федерацияси Бухоро вилоят бўлими матбуот хизмати