"Ролан Гаррос". Аёллар ўртасидаги жуфтлик турнирида чемпионлар аниқланди

Аёллар ўртасидаги жуфтлик баҳсларида ғолиблар аниқланди. Мусобақа бош соврини америкалик Коко Гофф ва чехиялик Катержина Синяковага насиб этди. Улар ҳал қилувчи финал учрашувида италиялик теннис маликалари Сара Эррани ва Жасмине Паолини ҳамкорлигини мағлуб этишди - 7/6(5), 6/3.

110 дақиқалик учрашув статистикаси:

Гофф/Синякова - 2 та эйс, 3 та қўшхато, 5 та брейк 

Эррани/Паолини - эйс йўқ, 1 та қўшхато, 4 та брейк 

Франция Очиқ чемпионатидаги муваффақиятли иштирок Гофф ва Синяковага 2000 рейтинг очкоси ҳамда 590,000 евро мукофот пули келтирди. Бу Гофф учун "Катта Дубулға" туркумидаги биринчи соврин бўлди. Шу кунгача у US Open-2021 ва "Ролан Гаррос"-2022 финалларида ўйнаган эди.

Синякова эса бу борада анча тажрибали ва омадли ҳисобланади. У саккизинчи "Катта Дубулға" чемпионлигини қўлга киритди. Фаолиятидаги умумий совринлари эса 24 тага етди. Бунгача у ватандоши Барбора Крейчикова билан бирга US Open ҳамда икки маротабадан "Ролан Гаррос", Уимблдон ва Australian Open турнирларида бош соврин соҳибасига айланган эди.