"Роллан Гаррос". Амалдаги чемпион финалга йўл олди

Аёллар ўртасидаги мусобақада финалчиларнинг номи маълум бўлди. Иккинчи ярим финалда дунёнинг биринчи ракеткаси Ига Свёнтек WTA рейтингида 14-ўринни эгаллаб турган бразилиялик Беатрис Хаддад Майяни 6/2, 7/6(7) ҳисобларида мағлубиятга учратди. 

Польшалик теннис маликаси бу билан нафақат финалга йўл олди, балки ўзаро учрашувлардаги ҳисоб мувозанатини ҳам тиклади - 1:1. Икки соату 9 дақиқа давом этган баҳсда Свёнтек 1 та эйс, 4 та брейкка эришди ва 4 та қўшхатога йўл қўйди. 

Эътиборлиси, Ига финалгача босиб ўтган йўлида рақибаларига биронта ҳам сетни ютқазмади. Польшалик 22 ёшли иқтидор эгаси фаолиятида тўртинчи бор "Катта Дубулға" турнирлари финалига чиқди. Ўзи иштирок этган барча финалларда ғалаба қозонган. У амалдаги "Ролан Гаррос" чемпиони ҳисобланади. Свёнтек бу сафар финалда чехиялик Каролина Муховага қарши кортга чиқади.