Роналду "Ал Насср"га ўтса, Саудия Арабистони, Греция ва Мисрнинг ЖЧ-2030 учун аризаси элчисига айланади

Криштиану Роналду "Ал Насср"га ўтишга яқин турибди.

Аввалроқ Саудия Арабистони клуби "Манчестер Юнайтед" собиқ ҳужумчисига 2025 йилгача мўлжалланган шартнома таклиф қилгани, бироқ унинг ўзи Европа жамоаларидан таклиф кутаётгани хабар қилинганди.

"Marca" хабарига кўра, саудияликлар яқин соатлар ичида футболчига расмий таклиф билан чиқишлари мумкин. Шу билан бирга, португалиялик 2030 йилгача мўлжалланган битимга имзо чекиши мумкин – 2,5 йил давомида у "Ал Насср"да ўйнайди, қолган вақтларда эса Саудия Арабистони, Греция ва Мисрнинг ЖЧ-2030 учун топширилган қўшма аризаси бўйича элчи вазифасини бажаради. 

Эслатиб ўтамиз, Роналдунинг ватани Португалия ҳам мусобақа мезбонлигига даъвогарлик қилаётган Испания ва Украина билан қўшма ариза топширган.

Шунингдек, агар Роналду "Ал Насср" аъзосига айланса, лиганинг молиявий қоидаларини бузмаслик учун жамоа уч нафар футболчи билан хайрлашиши маълум қилинган. Катта эҳтимол билан Гонсало Мартинес ва Жалолиддин Машарипов клубни тарк этади.

Роналду "Ал Насср"да 2,5 йил ичида 200 миллион евро ишлаб олади. Унинг 2030 йилги Жаҳон чемпионати учун элчи сифатидаги даромади янада юқори бўлади.