Роналдуга жавоб: итальян футболи тирик (мутолаа учун)

Криштиану Роналду Саудия футбол лигаси тез орада кўплаб Европа чемпионатларининг даражасига чиқишига ишончи комил. Португалиялик йўл-йўлакай интервьюларидан бирида А Серияни ҳам ерга урди.

Форвард итальян чемпионати у келгунга қадар ўлик бўлганини айтди. Ҳужумчи шунингдек Европанинг топ-5 лигаларидан тўрттаси, жумладан А Сериянинг ҳам даражаси тушаётганини айтди.

Тақдир ҳукмини қарангки, Роналду юқоридаги баёнотлардан сўнг ўртоқлик ўйинида ўтган мавсум Ла Лига аутсайдерларидан бири бўлган "Сельта"га 0:5 ҳисобида ютқазди. Бу баҳс шуни кўрсатдики, Саудия клубларининг чексиз пулларига қарамай, уларнинг жаҳон чўққисига чиқиши португалиялик ўйлаётганидан кўра қийинроқ.

"Криштиану қаерда бўлса, у қизиқишни кўтаради" деган гап тўғри. Аммо, А Серия у келганда ўлик эмасди ва кетганидан кейин ҳам пасайишга учрамади.

Шунчаки итальян клубларининг Европадаги сўнгги натижаларига қараш етарли. Улар ўтган мавсум барчасига даъвогарлик қилишди: "Интер" Чемпионлар лигаси финалига, "Рома" Европа лигаси финалига, "Фиорентина" эса Конференциялар лигаси финалига чиқди.

Аммо, А Серия клублари барча, 3 финални ютқазиб, совринларга эга чиқишмади. Аммо, итальянлар ўша жойга чиқишди ва уларнинг катта қисми сифатли футбол эвазига эришилди.

Италия ҳалигача Европанинг амалдаги чемпиони ҳисобланади, U-20 термаси эса ўтган ой жаҳон чемпионати финалига чиқди, U-19 жамоаси эса яқинда финалда Португалияни мағлуб этиб, Еврони ютди.

Албатта, итальян футболи мукаммаликдан йироқда. "Скуадра адзурра" икки бор жаҳон чемпионати саралишидан ўта олмади, клубларга катта трансферлар учун пул етишмаяпти, кўплаб стадионлар эса айниқса АПЛ фонида жуда ҳам яхши кўринишда эмас. Аммо, бу А Сериянинг ўликлигини англатмайди.

А Серия фаолиятидаги асосий жиҳатлардан бири Премьер-лига клубларининг кучайиш учун итальян клублари эшигини қоқишни давом эттираётганидир. "Манчестер Юнайтед" бир неча кун олдин Андре Онанани "Интер"дан бонусларсиз 52,5 млн еврога харид қилди ва "Аталанта"дан чиқиб келаётган юлдуз Расмус Хойлунн бўйича музокаралар олиб бормоқда.

Сандро Тонали ўтган ой "Ньюкасл"га 70 млн еврога ўтиш орқали бутун тарихдаги энг қиммат итальян ўйинчисига айланди. Битим нархи бонус билан 80 миллионгача чиқиши мумкин.

"Тоттенхэм" Гульельмо Викариони "Эмполи"дан 20 млн еврога харид қилди. Бир йил олдиан эса 18 миллионга Дэстини Удоджини харид қилиб, 2022/23 йилги мавсум "Удинезе"да ижарада қолдирганди. Викарио энг кам баҳоланган итальян дарвозабонларидан бири ҳисобланади, Удоджи эса ҳимоячи учун яхши самарадорлик кўрсатмоқда (А Серияда ўтган мавсум 3та гол ва 4та ассист).

Марцело Брозович "Ал Насср"дан "Интер"га 18 млн еврога ўтди. Чемпионлар лигаси финалчилари муҳим хавбек учун кўпроқ пул ишлашлари мумкин эди, аммо молиявий вазият "нерадзурри"ни саудияликлар таклиф қилганига рози бўлишга мажбур қилди. Аммо, улар доим ҳам бундай қилишмайди.

Ромелу Лукаку мисоли бор. Унинг "Челси"га қайтиши ўхшамади, аммо "кўклар" атиги 2 йил олдин "Интер"га рекорд миқдордаги 115 млн евро тўлаб, бельгиялик билан энг қиммат трансферларини амалга оширишган эди. Албатта, А Серия дунёдаги энг бой лига эмас, ушбу барча йирик трансферлар чемпионатнинг даражаси ҳеч қаерга кетмаганини кўрсатади.

Булардан ташқари, А Серияда рақобат ҳам ошмоқда. "Ювентус"нинг ҳукмронлиги Роналдунинг "бьянконери" таркибидаги сўнгги мавсумида якунланганди. Италияда 2020 йилдан 2023 йилгача 3 турли клуб чемпион бўлди. Фақатгина Испанияда шундай ҳолат рўй берганди: "Барселона", "Реал" ва "Атлетико" сўнгги 3 йилда чемпионлик титулига эга чиқишди. 

А Серия, умуман бутун итальян футболига мамлакатдаги ўйинлар ривожи учун муҳим қарор қабул қилиш керак ва лигадаги майдонлар ва уларнинг атрофидаги ҳолатни яхшилашни хоҳловчи инвесторларни жалб қилиш керак.

Сир эмаски, янги стадионлар қуриш итальян клублари учун мақсаддир ва А Серия Англия ёки Саудия Арабистони клублари каби бой эмас. Аммо, лига савиясининг тушиб кетгани ҳақидаги гаплар жуда ошириб юборилган.

Football Italia материллари асосида footballhd.ru сайтидаги мақола. Алишер Остонов таржимаси