17 май 09:59
Янгиликлар

Бокс/ММА

Ронда Роузи — Жина Карано жанги 17 сония давом этди

АҚШнинг Лос-Анжелес шаҳрида ташкил этилган Most Valuable Promotions турнирининг асосий жанги икки аёл аралаш яккакураш вакилалари ўртасида бўлиб ўтди.

Ўн йиллик танаффусдан сўнг октагонга қайтган 39 ёшли собиқ UFC чемпиони Ронда Роузи 44 ёшли Жина Каранога қарши октагонга чиқди. Бир ярим йилда 45 кг вазн ташлаган Карано сўнгги бор 2009 йилда жанг ўтказганди.

Рози жангда дарҳол Каранони партерга ўтказиб, бир нечта зарбалар берди, кейин рақибининг қўлини ушлаб олди ва оғритиш усули билан Жинани таслим этди. Айнан шу усул Роузига ўтмишдаги аксарият жангларида ғалаба келтирган эди. Бугунги ғалабаси учун Роузига 17 сония кифоя қилди.