Россия ММАсида йил жанги тасдиқланди

Россиялик таниқли аралаш яккакураш усталари Владимир Минеев ва Иван Штирков рингда ўзаро кикбоксинг қоидалари асосида ўтказиладиган жангда тўқнаш келишади. Томонлар ўртасида бир неча ой давом этган музокаралардан сўнг жанг 18 ноябрь куни Сочи шаҳрида ўтказилиши тасдиқланди. Бу ҳақда AMC Fight Nights промоушени президенти Камил Гаджиев хабар берди.

"Бу жанг расман тасдиқланди. Минеев vs Штирков, 18 ноябрь, валидол таблеткаларини ғамлаб олинг. Мен 22 сентябрь куни Екатеринбург шаҳрига учаман ва у ерда Иван ва Николай Клименко билан учрашиб, жанг шартномасига имзо чекамиз. Дарвоқе, бир йилдан сўнг ММА қоидалари асосида реванш жанги ўтказилади", - деди Гаджиев.

Маълумотларга қараганда, Минеевнинг жанг учун гонорари 15, Штирковнинг улуши эса 10 миллион рублни ташкил этади. 

33 ёшли Владимир Минеев айни пайтда ўрта вазн тоифасида AMC Fight Nights промоушени чемпиони ҳисобланади. Сўннгги жангини 15 сентябрь куни кикбоксинг қоидалари асосида ўтказиб, собиқ Bellator чемпиони, бразилиялик Рафаэль Карвальони иккинчи раундда нокаутга учратганди. 35 ёшли Иван Штирков эса ўтган ойда оғир вазн (101.6 кг.гача) тоифасида Hardcore Boxing камари учун кечган жангда Константин Ерохинга биринчи раунднинг ўзида нокаут билан ютқазганди.