Рўзибоевнинг рақиби Олексейчук эмас. Ҳамюртимизга истиқболли UFC жангчиси берилгани айтилмоқда + ФОТО

Аввалроқ, ушбу турнир доирасида ўзбекистонлик аралаш яккакураш устаси Нурсултон Рўзибоевнинг ҳам октагонга кўтарилиши ҳақида хабар берган эдик. Манбалар спортчимизнинг польшалик Михал Олексейчук билан жанг қилиши бўйича маълумот тарқатганди.

Бироқ бугун тонгда ишончли инсайдерлар ва ММА нашрлари Нурсултоннинг бошқа спортчи билан баҳс олиб бориши ҳақида хабар берди. Унга кўра, Нурсултон Рўзибоев UFC 319 турнири доирасида америкалик Брайан Баттл билан тўқнаш келади. Нурсултоннинг ўзи ҳам Instagram саҳифаси орқали бу янгиликни улашди.

Ҳозирча ушбу жанг турнирнинг прелим кардига жойлаштирилган.

Маълумот учун, Андижонда туғилган Рўзибоев фаолияти давомида 47 та жанг ўтказиб, 36 ғалаба, 9 мағлубият ва 2 та дуранг қайд этган. У билан тенгдош, The Ultimate Fighter 29 шоусининг ғолиби Брайан Баттл ҳисобида эса 12 ғалаба ва 2 мағлубият бор. У сўнгги тўртта жангининг барчасида рақибларидан устун келган.

UFC 319 турнирининг марказий жанги ўрта вазн чемпиони Дрикюс Дю Плесси ҳамда даъвогар Хамзат Чимаев ўртасида кечади.