Руслан Нурудинов жаҳон чемпионатида супачага чиқди

Бундан бир неча дақиқа аввал -109 кг вазн тоифасидаги атлетлар ўртасидаги баҳслар якунланди. Ушбу вазнда Рио Олимпиадаси чемпиони ва рекордчиси, Осиё ўйинлари ғолиби ҳам рекордчиси Руслан Нурудиновнинг чиқиши кўпчиликни қизиқтираётганди. 

Афсуски, бу сафар ҳамюртимиз кутилган натижани қайд этмади. У даст кўтаришдаги уччала имкониятдан ҳам фойдалана олмади. Бу спорт, ҳар сафар ҳам ўйлаган нарсалар амалга ошавермайди. Руслан силтаб кўтаришда 227 кг оғирликни ўзига бўйсундириб, бронза медали билан кифояланди. 

Польшалик Аркадиус Михальский 228 кг билан кумуш медални қўлга киритган бўлса, арманистонлик Симон Мартиросян жаҳон рекорди - 240 кг билан олтин медалга эга чиқди. Айнан унинг ўзи икки кураш якунларига кўра 435 кг натижа билан жаҳон чемпионига айланди. Бу ҳам жаҳон рекорди ҳисобланади.