Сабина Давлатова: "Ўзбекистон самбо ассоциацияси тайёргарликка алоҳида эътибор қаратмоқда"

"Тайёргарлик жараёни жуда яхши ўтмоқда. Ўзбекистон самбо ассоциацияси раҳбарияти, шахсан раис Алишер Алимовнинг ўзлари томонидан бизга эътибор қаратилмоқда. Кунига икки маҳал машғулотлар олиб бормоқдамиз. Машғулот жараёни ҳам қизиқарли тарзда ташкил этилади. Бу ўз навбатида спортчининг машғулотлардан зерикмаслигини таъминлайди. Чунки ҳар куни турлича, қизиқарли машқларни бажарамиз. 

Ҳар бир самбочининг мақсади битта - Ўзбекистон шаънини муносиб ҳимоя қилиш. Ушбу жаҳон чемпионатида Ўзбекистон байроғини баланд кўтармоқчимиз. Ўзбекистон - менинг Ватаним ва оилам. Мақсадим - уларни ҳимоя қилиш. 

Мен илк маротаба жаҳон чемпионатида қатнашаман. Шундай бўлсада, қайси давлат вакиллари кучли ва тажрибали эканлигини биламан. Ўзбекистон терма жамоасига асосан россиялик самочилар рақиблик қилишади. 

Жаҳон чемпионатининг Ўзбекистонда ўтказилиши катта воқеа. Ушбу мусобақада барча жамоадошларимизда ҳаяжон катта бўлса керак деб ўйлайман. Насиб бўлса, барчангизни ишончингизни оқлаймиз", - деди Сабина Давлатова.

Ўзбекистон самбо ассоциацияси матбуот хизмати