12 дек 08:58
Янгиликлар

Теннис

Саидаъло Исломободдаги иштирокини аъло даражада бошлади

Покистоннинг Исломобод шаҳрида теннис бўйича “Фьючерс” туркумига кирувчи турнирнинг асосий тўр баҳслари давом этмоқда.

Соврин жамғармаси 15 000 АҚШ долларини ташкил қилувчи мусобақада ҳамюртларимиз ҳам иштирок этяпти. Улардан Саидаъло Саидкаримов иккинчи давра йўлланмасини қўлга киритди. Теннисчимиз покистонлик Хира Ашиқни 6:3, 6:3 ҳисобида таслим этди. Энди у чорак финал чиптаси учун турнирнинг иккинчи ракеткаси япониялик Рио Ногучига қарши кортга чиқади.

Асосий тўрга саралаш баҳслари орқали етиб келган Шониғматжон Шофайзиев эса асосий тўрнинг илк даврасида турнирнинг еттинчи ракеткаси эронлик Ҳамидризо Надафга 3:6, 6:1, 3:6 ҳисобида ютқазиб қўйди. Бу билан у Покистондаги иштирокини якунлади. Жуфтликлар мусобақасида биргина Саидаъло Саидкаримов иштирок этади.