Saint Louis Rapid & Blitz. Абдусатторов биринчи кун уч америкалик гроссмейстер билан ўйнади

Бу ҳисоб бўйича GCT туркумидаги тўртинчи мусобақа бўлиб, дунёнинг кўзга кўринган юлдузлари бош соврин учун ўзаро баҳсларга киришишди. 15 августга қадар давом этадиган турнирда ҳамюртимиз Нодирбек Абдусатторов юртимиз шарафини ҳимоя қилади. 

Мусобақа форматига кўра, ўйинлар 3 кун рапид (25+10) ва 2 кун блиц (5+2) йўналишида ўтказилади. Рапидда ғалаба учун 2, блицда эса 1 очко берилади. Рапид турнири 9 тур, блиц мусобақаси эса айлана тизимда 18 турдан иборат бўлади. 

Saint Louis Rapid & Blitz турнири иштирокчилари: Нодирбек Абдусатторов, Фабиано Каруана (АҚШ), Гукеш Доммараджу (Ҳиндистон), Максим Вашье-Лаграв (Франция), Уэсли Со (АҚШ), Ле Куанг Льем (Вьетнам), Леньер Домингьез (АҚШ), Левон Аронян (АҚШ), Сэм Шанкланд (АҚШ), Григорий Опарин (АҚШ)

Мусобақанинг биринчи куни рапид йўналишида 3 та тур учрашувлари ўтказилди. Нодирбек уччала партияда ҳам америкалик гроссмейстерларга қарши баҳс олиб борди. Биринчи турда қора доналарда Уэсли Со билан дурангга имзо чекди. Иккинчи турда Фабиано Каруанага имкониятни бой берди. Учинчи турда эса ютуқли партияда қўпол хатога йўл қўйиши натижасида Левон Аронянга аламли тарзда ютқазиб қўйди. 

Бугун Абдусатторов 4-турда яна АҚШ вакили Григорий Опаринга қарши оқ доналарда ўйнайди. Бешинчи турда қора доналарда вьетнамлик гроссмейстер Ле Куанг Льем, 6-турда оқ доналарда амалдаги жаҳон чемпиони, ҳиндистонлик азалий рақиби Гукеш Доммараджу билан ҳисоб-китоб қилади. Бугун ҳам рапид баҳсларида 3 та тур ўтказилади.