Saint Louis Rapid & Blitz. Абдусатторов иккинчи кун баҳсларини яхши ўтказди

Бу ҳисоб бўйича GCT туркумидаги тўртинчи мусобақа бўлиб, дунёнинг кўзга кўринган юлдузлари бош соврин учун ўзаро баҳсларга киришган. 15 августга қадар давом этадиган турнирда ҳамюртимиз Нодирбек Абдусатторов юртимиз шарафини ҳимоя қилмоқда. 

Мусобақа форматига кўра, ўйинлар 3 кун рапид (25+10) ва 2 кун блиц (5+2) йўналишида ўтказилади. Рапидда ғалаба учун 2, блицда эса 1 очко берилади. Рапид турнири 9 тур, блиц мусобақаси эса айлана тизимда 18 турдан иборат бўлади. 

Saint Louis Rapid & Blitz турнири иштирокчилари: Нодирбек Абдусатторов, Фабиано Каруана (АҚШ), Гукеш Доммараджу (Ҳиндистон), Максим Вашье-Лаграв (Франция), Уэсли Со (АҚШ), Ле Куанг Льем (Вьетнам), Леньер Домингьез (АҚШ), Левон Аронян (АҚШ), Сэм Шанкланд (АҚШ), Григорий Опарин (АҚШ)

Мусобақанинг биринчи куни рапид йўналишида 3 та тур учрашуви ўтказилиб, унда Нодирбек 1 дуранг, 2 мағлубият қайд этганди. Абдусатторов иккинчи кун ўтказилган 3 та учрашувнинг биттасида ғалаба қозониб, 2 тасида рақиблари билан дурангга имзо чекди. У 4-турда АҚШ вакили Григорий Опаринни мағлубиятга учратди. Бешинчи турда қора доналарда вьетнамлик гроссмейстер Ле Куанг Льем, 6-турда эса оқ доналарда амалдаги жаҳон чемпиони, ҳиндистонлик азалий рақиби Гукеш Доммараджу билан муросага келди. 

Бугун рапид баҳсларининг учинчи куни яна 3 та тур учрашуви ўтказилади. Абдусатторов 7-турда қора доналарда франциялик Максим Вашье-Лагрва, 8-турда ҳам қора доналарда америкалик Сэм Шанкланд, 9-турда эса оқ доналарда яна бир АҚШ вакили Леньер Домингесга қарши баҳс олиб боради. Ҳозирча ҳамюртимиз 5 очко билан 10 иштирокчи орасида 7-ўринни эгаллаб турибди.