Санжар Раҳмоновнинг навбатдаги жанги қачон бўлиб ўтади?

Уч йилдан бери фаолиятини АҚШнинг Лас-Вегас шаҳрида давом эттираётган чарм қўлқоп устамиз таътилни мароқли ўтказиш мақсадида ўзи туғилиб ўсган Андижонга қайтганди. Айни пайтда у Тошкентда машғулотларини олиб боряпти.

Бугун сайтимиз меҳмони бўлган Раҳмонов кўплаб саволлар қатори ўзининг навбатдаги жангини қачон ўтказишига ҳам ойдинлик киритди. Режа бўйича жанг май ойида Лас-Вегас шаҳрида бўлиб ўтади. Ҳозирда унинг менежерлари номзод рақиб боксчиларининг жамоаси билан музокара олиб боришяпти. 

“Тошкентга қайтишимдан олдин Флойд Мейвезер билан бир эмас, уч маротаба учрашдим. Суҳбатимизнинг асосий мавзуси айнан менинг навбатдаги жангим масаласи бўлди. У мендан чемпионлик камари учун жангга тайёрмисан деб сўради. Мен унга яна 2-3та жангдан сўнг деб жавоб бердим”, - деди енгилмас боксчимиз Раҳмонов.

Маълумот учун, афсонавий Флойд Мейвезер клуби номидан жангларда иштирок этиб келаётган Санжар Раҳмонов профессионал боксдаги фаолияти давомида 11та жанг ўтказган бўлиб, шуларнинг 10тасида ғалаба қозонган. Битта жангда эса дуранг натижа қайд этилган.