Санжар Турсунов: Мен Олимпиадага йўлланма олдим... гап-сўзларга эса аҳамият бермайман!

Кеча кечки дастурдан ўрин олган -91 кг вазн тоифасидаги чорак финал жанглари бўлиб ўтди. А рингда Амиршоҳ Самадов Токио Олимпиадаси йўлланмаси соҳиби Санжар Турсуновга қарши рингга чиқди. Қийин кечган жанг сўнгида Турсуновнинг қўли баланд кўтарилди. Ғалабадан кейин Санжар Турсуновдан кичик интервью олишга муваффақ бўлдик.

- Юзага келган пандемик вазият туфайли барча каби сиз ҳам анча муддат жанг ўтказмадингиз...

- Карантин бўлса-да, машғулотлар тўхтаб қолгани йўқ. Лекин машғулот бошқа, мусобақа бошқа. Сиз айтгандек, 7-8 ойдан буён катта рингда жанг қилмадим. Мусобақаларда иштирок этмай тайёргарлик кўриб юраверсак, даражамиз ҳам пасайиб бораверади.

- Белгиланган оғирликни бажариш учун неча килограмм вазн ташладингиз?

- Аввалига 106 кг эдим. Кейин 14-15 кун оралиғида -91 килога тушдим.

- Ўтган йили ярим финалда Жамшиджон Абдуллаевга имкониятни бой бериб қўйган эдингиз...

- Тўғри, ўшанда жаҳон биринчилигидан келгандим. Яна 10-15 кундан сўнг жанг қилишим керак эди. Очиғини айтаман, мамлакат чемпионатига тайёргарлик кўрмадим, вақт ҳам бўлмади. Машғулот ҳам ўтказмадим, фақат ухладим. Шунинг учун мусобақани эрта тарк этганман. Бу сафар Худо хоҳласа, ҳаммаси яхши бўлади.

- Бокс мухлислари сизни вазнингизда биринчи рақамли боксчи номига муносиб эмас деб жуда кўп танқид қилишади. Бунга қандай муносабатдасиз?

- Одамлар ҳамма нарсани гапираверди. Мен халқаро турнирларда натижа қилаяпман. Мен Олимпиадага лицензия олдим, бўлди тамом. Тўғрисини айтсам, гап-сўзларга аҳамият бермайман. 

- Агар Олимпия ўйинларида натижа қилолмасангиз, терма жамоага қайтмайдиган бўлиб профессионал боксга ўтиб кетасизми?

- Тўлиқ проф боксга ўтаман, албатта. Лекин Худо хоҳласа Олимпиадада медаль оламан.

Сарвиноз Раҳмонқулова суҳбатлашди