Сауль Альварес Мексика боксининг ўзидан кейинги суперюлдузи ким бўлишини айтди

Яқиндагина 23 ёшга тўлган Марко Верде бир ойдан кейин профессионал рингда дебют жангини ўтказади. Сауль Альвареснинг фикрича, айнан Верде ўзи фаолиятини якунлаганидан кейин Мексиканинг энг машҳур боксчисига айланади. 

"Бизда ёш, истиқболи порлоқ боксчилар жуда кўп. Лекин улар орасида Марко Верде ажралиб турибди. Бу менинг шахсий фикрим ва танловим. Бу йигитча Мексика боксининг келажаги. Бунга ишончим комил. Марко қатъий интизом ҳамда улкан салоҳиятга эга. Мен унда ана шу жиҳатларни кўрдим", — деди Канело Fight Hype нашрига берган интервьюсида.

Маълумот учун, 23 ёшли Марко Верде 71 кг вазнда Париж-2024 Олимпиадасининг кумуш медали совриндори ҳисобланади. Марко 3 май куни Саудия Арабистонидаги проф бокс оқшомида дебют жангини ўтказади. Ушбу оқшомнинг асосий жанги Сауль Альварес ва Уильям Скулл ўртасида бўлиб ўтади. Верденинг отаси ҳам боксчи бўлган, у 1992 йилги Барселона Олимпиадасида иштирок этган.