Шаҳрилло Маҳмудов Халқаро оғир атлетика федерацияси Ижроия Қўмитаси аъзолигига сайланди

25 май куни бошланган мазкур Конференцияда янги Олимпия цикли, яъни 2017-2020 йилларга федерация раҳбариятининг янги таркиби сайланди. Унинг якунларига кўра Ўзбекистон оғир атлетика федерацияси раисининг биринчи ўринбосари Шаҳрилло Махмудов Халқаро оғир атлетика федерацияси Ижроия Қўмитаси аъзолигига сайланди. Шу пайтгача Шаҳрилло Шариповичнинг Халқаро федерациядаги лавозими Техник Қўмита аъзолиги эди. 

Шунингдек, Халқаро оғир атлетика федерацияси Президенти этиб, 12 йилдан буён шу лавозимда ишлаб келаётган венгриялик Томаш Аян қайта сайланди. Халқаро оғир атлетика федерацияси Бош котиблиги айни пайтга қадар Осиё оғир атлетика федерацияси Бош котиби лавозимида ишлаб келган ироқлик Муҳаммад Ҳасан Жалудга ишониб топширилди. Сайлов натижаларига кўра, Биринчи вице президент лавозимига таиландлик Интарат Йодбангтой номзоди маъқулланди. 

Овоз бериш йўли билан руминиялик Нику Влад, перулик Хосе Карлос, қозорғистонлик Жанат Туссупбеков ва чехиялик Петр Крол Халқаро федерация вице-президентлигига сайланишди. Навбатдаги сайлов бу Осиё оғир атлетика федерацияси сайлови бўлиб, у жорий йилнинг 20-30 июль кунлари Непалда ўтказиладиган ёшлар ва ўсмирлар ўртасидаги Осиё чемпионати давомида, мамлакат пойтахти Катмандуда ўтказилиши режалаштирилган.  

Ўзбекистон Миллий олимпия қўмитаси мамлакатимизда оғир атлетика спорт турининг ривожланишига салмоқли ҳисса қўшиб келаётган мутахассис, Ўзбекистон оғир атлетика федерацияси раисининг биринчи ўринбосари, Халқаро оғир атлетика федерацияси ва Ўзбекистон Миллий олимпия қўмитаси Ижроия Қўмиталарининг аъзоси Шаҳрилло Маҳмудовга келгуси фаолиятида ҳам омад ва зафарлар тилаб қолади.