25 авг 12:39
Янгиликлар

Спорт курашлари, Бокс/ММА

Шара Буллетнинг Москва турниридаги янги рақиби маълум бўлди + ПОСТЕР

Ўрта вазн тоифасида иштирок этувчи 32 ёшли россиялик машҳур UFC жангчиси Шарабутдин Магомедовнинг рақиби сафдан чиққанди.

Кўпчиликка Шара Буллет номи билан танилган аралаш яккакураш устаси Москвада бўлиб ўтадиган RAF кураш лигаси турнирида бразилиялик Нейман Грейси билан тўқнаш келади. Беллашув аввалдан белгиланганидек, 5 сентябрь куни бўлиб ўтади.

Дастлаб Магомедовнинг рақиби россиялик Александр Шлеменко бўлиши керак эди, бироқ у соғлиғи билан боғлиқ муаммолар туфайли сафдан чиққан эди. Энди унинг ўрнини Bellator ва PFL лигаларида иштирок этган Нейман Грейси эгаллайди.

Маълумот учун, Шара Буллетнинг профессионал ММА рекордида 17 та ғалаба (шундан 12 таси нокаут билан) ва битта мағлубият бор. Магомедов аралаш яккакурашлардаги профессионал фаолиятини 2017 йилнинг декабрь ойида бошлаган.