Sharjah Masters 2025 якунланди. Абдусатторов шоҳсупада! Қолган шахматчиларимиз нечанчи ўринларни эгаллашди?

Мукофот жамғармаси 73 000 АҚШ долларини ташкил этган ушбу мусобақанинг кучлилар жам бўлган "Masters" гуруҳида тўрт нафар гроссмейстеримиз - Нодирбек Абдусатторов, Жаҳонгир Воҳидов, Муҳиддин Мадаминов ва Ортиқ Ниғматов ҳам совринли ўринлар учун баҳс олиб боришди. 

Кеча мусобақада сўнгги 9-тур учрашувлари бўлиб ўтди. Мусобақада биринчи рақам остида сараланган Нодирбек Абдусатторов биринчи доскада қора доналарда турнирнинг бешинчи рақамли иштирокчиси, эронлик гроссмейстер Амин Табатабайи билан дурангга имзо чекди. Нодирбекнинг очко йўқотишидан унумли фойдаланган иккинчи рақамли шахматчи, нидерландиялик Аниш Гири оқ доналарда ҳиндистонлик Адитя Миттални мағлубиятга учратди ва 7 очко билан Sharjah Masters 2025 чемпионига айланди. 

Нодирбек Абдусатторов 6,5 очко билан қўшимча кўрсаткичларга кўра учинчи ўринни эгаллади. Сўнгги турда қора доналарда ўйнашига қарамай, эронлик Данешвар Бардияни мағлуб этган сербиялик Александр Инджич 6,5 очко билан иккинчи ўринни банд этди. 

Sharjah Masters 2025 турнирининг 9-турида Жаҳонгир Воҳидов оқ доналарда польшалик Малек Жандан устун келди. Муҳиддин Мадаминов қора доналарда туркиялик Ишик Алпарслан билан дуранг ўйнади. Ортиқ Ниғматов эса оқ доналарда яна бир турк шахматчиси Санал Ваҳаб билан муросага келди. 

Шу тариқа, Нодирбек Абдусатторов 6,5 очко билан 3, Ортиқ Ниғматов 4,5 очко билан 34, Муҳиддин Мадаминов 4 очко билан 60, Жаҳонгир Воҳидов эса 3,5 очко билан 66-поғонадан жой олди.