Шавкат Раҳмонов қандай ҳолатда UFC чемпионлик пойгасига қайтиши мумкинлиги айтилди

"Номад" лақабли Раҳмонов охирги марта 2024 йил охирида Иэн Гэррини ҳакамлар қарори билан мағлуб этганидан кейин октагонга чиқмаган. Кейинчалик у тиззасидан икки марта операция қилинди ва узоқ реабилитация жараёнидан ўтди.

Нашр спортчи ҳақида шундай ёзмоқда: 

"Барча қийинчиликларга қарамай, Шавкат Раҳмонов машғулотларга қайтган ва фаолиятини тиклаш учун навбатдаги уринишни бошлаган. Шифокорларнинг фикрича, у келаси йил жангларга қайтиши мумкин, аммо ҳозирча расман ҳеч қандай жанг эълон қилинмаган.

Сўнгги маълумотлар Раҳмоновнинг келажаги атрофидаги ноаниқлик сақланиб қолаётганини кўрсатмоқда. Тиззадаги такрорий жароҳатлар ММАнинг юқори даражасига қайтишни анча қийинлаштириши мумкин. Айниқса, тайёргарлиги оғир машғулот йиғинларини талаб қиладиган ва услуби тезкор ҳамда портловчи ҳаракатларга асосланган жангчи учун.

Шунга қарамай, ҳозирча Раҳмонов фаолияти якунланаётгани ҳақида гапиришга асос йўқ. Агар у тўлиқ тикланиб, машғулот йиғини давомида саломатлиги билан боғлиқ муаммоларга дуч келмаса, ярим ўрта вазнда яна чемпионлик учун асосий даъвогарлар қаторига қайтиши мумкин. Бироқ ҳозирча унинг кутилган қайтиши ҳамон савол остида қолмоқда".