Шахмат бўйича Осиё чемпионатининг илк куниёқ рапид бўйича биринчи бўлдик + ФОТОГАЛЕРЕЯ

21 июлга қадар давом этадиган XVII Осиё чемпионатида ҳамюртларимиздан ташқари Австралия, Бангладеш, Хитой, Гонгконг, Ҳиндистон, Қозоғистон, Қирғизистон, Малайзия, Мўғулистон, Янги Зеландия, Қатар, Шри-Ланка, Тожикистон, Туркманистон, Бирлашган Араб Амирликлари ҳамда FIDE байроғи остида 7, 9, 11, 13, 15 ва 17 ёшгача бўлган ўсмир ва қизлар ғолиблик учун дона сурмоқда.

Бугун қитъа биринчилигининг илк куни 400 нафарга яқин салоҳият эгалари рапид йўналишида ўзаро дона суришди. Қувонарлиси, якунда Ўзбекистон терма жамоаси 4 та олтин, 5 та кумуш, 5 та бронза, жами 14 та медаль билан 17 давлат орасида умумжамоа ҳисобида биринчи ўринни эгаллашди. 

Мўғулистон 4 та олтин ва 1 та кумуш медаль билан иккинчи ўринни банд этган бўлса, кучли учликка 2 та олтин, 1 та кумуш, 1 та бронза медали билан ҳиндистонлик ёш шахматчилар якун ясашди. Бугунги баҳсларда FIDE, Турканистон, Қозоғистон, Бангладеш, Янги Зеландия ва Қирғизистон терма жамоалари ҳам ўз ҳисобларига Осиё чемпионатининг медалларини қўшиб қўйишди. 

Шунингдек, бугун Осиё чемпионатининг тантанали очилиш маросими ҳам ўтказилди. Эртага иштирокчилар классик йўналишда 9 тур давомида ўз маҳоратларини намойиш этишади. 20 июль - Халқаро шахмат кунида чемпионатнинг блиц йўналишида ҳам кучлилар сараланади.

Маълумот учун, қитъа биринчилигида FIDE усталари ва FIDE усталигига номзод шахматчилар ҳам иштирок этади.

Суратлар муаллифи - Алимурод МАМАДАМИНОВ, ўз мухбиримиз