Шахматчи қизларимиз FIDE Жаҳон кубогининг иккинчи босқичига йўл олишди

Ушбу нуфузли мусобақада Ўзбекистон терма жамоасининг уч нафар етакчи вакилалари ҳам баҳс олиб боришяпти. Икки шахматчимиз Жаҳон кубоги биринчи босқичининг ҳар икки учрашувида ғалаба қозониб, иккинчи даврага йўл олишганди. Кеча тай-брекда ғалаба қозонган Умида Омонова ҳам улар сафига қўшилди.  

Омонова франциялик рақибаси Софи Миллиет билан асосий икки партияда дуранга имзо чекканди. Шахматчиларнинг тай-брекдаги учрашувида Умида устун эканини амалда исботлади. Гулруҳбегим Тоҳиржонова кубалик аёл гроссмейстер Ерисбел Миранда Лаленсни, Афруза Ҳамдамова перулик Фиорелла Контрерас Ҳуамманни 2:0 ҳисобида таслим этганди. 

Бугун Жаҳон кубогининг иккинчи босқич баҳслари бўлиб ўтади. Гулруҳбегим хитойлик халқаро спорт устаси Лу Миаойига, Умида Европа чемпиони, польшалик Алина Калинскаяга қарши дона суради. Афруза Ҳамдамовани эса жиддий синов кутиб турибди. Ёшлар ўртасида икки карра жаҳон чемпиони бўлган шахматчимиз ҳиндистонлик гроссмейстер, рапид йўналишида икки карра жаҳон чемпиони Ҳампи Конеру синовидан ўтади. 

Иккинчи босқич партиялари бизнинг вақт билан соат 16:00да бошланади.