Шахматчиларимиз "Qonaev Cup 2025" турниридаги иштирокларини бошлашди

Учта гуруҳда ташкил этилаётган мусобақанинг умумий мукофот жамғармаси 100 000 АҚШ долларидан иборат. Турнирда 19 давлатдан жами 268 нафар шахматчи совринли ўринлар учун баҳсларга киришди. Ўзбекистон шарафини 5 нафар шахматчимиз ҳимоя қиляпти. 

Мукофот жамғармаси 78 000 долларни ташкил этувчи "Masters" гуруҳида Муҳаммадзоҳид Суяров (2488) ва Ҳумоюн Бегмуратов (2466), 15 000 доллар соврин пулига эга "Challengers" гуруҳида эса гроссмейстеримиз Алексей Барсов (2323), шунингдек Миразиз Матякубов (2260) ҳамда Азамат Дауримбетов (2199) ўз омадини синаб кўрмоқда.

Биринчи турда Муҳаммадзоҳид Суяров қора доналарда қозоғистонлик Сатбек Ахмединов (2375) билан дурангга имзо чекди. Ҳумоюн Бегмуратов ҳам қора доналарда ўйнаб, мезбонлар вакили Аяулим Калдарова (2220) билан муросага келди.    

"Challengers" гуруҳида қатнашаётган уч нафар вакилимизнинг бари 1-турда ғалабага эришди. Тажрибали Алексей Барсов оқ доналарда FIDE байроғи остида ўйнаётган Григорий Фёдоровни таслим этди. Миразиз Матякубов ва Азамат Дауримбетов эса мос равишда қозоғистонлик шахматчилар Дармен Даурен ҳамда Дмитрий Даниловдан устун келди.