Шахматчиларимиз U-16 Бутунжаҳон Ўсмирлар Олимпиадасини кетма-кет учта ғалаба билан бошлашди

Нуфузли мусобақада дунёнинг 45 давлатидан 90 та жамоа бош соврин учун баҳсларга киришган. Ўзбекистон терма жамоаси ўртача рейтинг бўйича 2-ўринда қайд этилган бўлиб, шахматчиларимиз Бутунжаҳон Олимпиадани кетма-кет 3 та ғалаба билан бошлашди.   

Олимпиадада халқаро гроссмейстер Сайдали Юлдашев бош мураббийлигидаги Ўзбекистон терма жамоаси иштирок этяпти. Таркибдан халқаро спорт усталари Ҳумоюн Бегмуратов (2435), Муҳаммадзоҳид Суяров (2356), FIDE спорт устаси Асроржон Омонов ва аёллар халқаро спорт устаси, ёшлар ўртасида икки карра жаҳон чемпиони Афруза Ҳамдамова жой олган. 

Ўзбекистон терма жамоаси Олимпиаданинг 1-турида мезбонларнинг Колумбия 10 жамоасидан 4:0 ҳисобида устун келди. Иккинчи турда Эквадорнинг биринчи рақамли терма жамоаси 3:1 ҳисобида мағлуб этилди. Шахматчиларимиз 3-турда Перунинг асосий жамоасидан устун келишди - 4:0. 

Бугун 4-турда Ўзбекистон терма жамоаси ўзи сингари 3 та учрашувда юз фоизлик натижа қайд этган Қозоғистон 2 жамоасига қарши баҳс олиб боради. Ўзбекистон ва Қозоғистондан ташқари FIDE 1, FIDE 2, Хитой, Қозоғистон 2, Колумбия 1 ва Куба 1 жамоалари ҳам 3 тадан ғалабага эга бўлиб турибди.