Шодиев ва Исломов Жаҳон чемпионатининг бронза медали учун курашади

Жаҳон чемпионатининг 92 кг вазн тоифасидаги баҳсларида юртимиз шарафини ҳимоя қилаётган Рустам Шодиев 1/8 финалда италиялик Давиде Коссуни 10-0 ҳисобида мағлуб этган, аммо чорак финалда россиялик Азамат Закуевга имкониятни бой бериб қўйганди. 

Закуев финалга йўл олгани боис, Шодиевда бронза медали учун курашиш имконияти юзага келди. Бунинг учун у аввалига ўтиш баҳсида македониялик Стол Ефтимовни мағлуб этиши шарт. Кейин эса бронза медали учун кечалиган учрашувда ярим финалда мағлубиятга учраган туркиялик Эрхан Яйлачига қарши гиламга чиқади.   

86 кг вазн тоифасидаги эркин курашчимиз Бобур Исломовда ҳам жаҳон чемпионатининг бронза медалини қўлга киритиш имконияти юзага келди. Уни 1/8 финалда мағлуб этган украиналик Муҳаммад Алиев финалга етиб борди. Энди Исломов ўтиш беллашувида германиялик Ларс Шайфлега қарши гиламга чиқади. Ғалаба қозонган тақдирда уни бронза медали учун бўлиб ўтадиган учрашувда россиялик Загид Каримов қарши олади. 

Чорак финалга етиб келган 74 кг вазн тоифасидаги эркин курашчимиз Асомиддин Ҳасанов Храяр Алиханянга 0-10 ҳисобида имкониятни бой берганди. Лекин арман курашчисининг ўзи ҳам ярим финалда мағлубият аламини тотиб кўрди ва бу билан Ҳасановга бронза учун курашиш эшикларини ёпди.